VPIEF iputum bakeken MV Nalkutan long solwota

I no longtaem, bambae MV Nalkutan 2 I joinem ol ship blong servesem ol aelan blong Vanuatu.

Ol member blong Vanuatu People’s Investment & Equity Fund (VPIEF) i rissolve finis long fes eva Annual General Meeting blong olgeta long 22 Disemba blong oli karem bak ol operesen we Vanuatu Cooperative Federation (VCF) i bin kareaot long Vanuatu bifo mo afta long indipendens long 1980.

Wan long ol operesen blong VCF we ol memba blong VPIEF i wandem karem bak hem i ol shipping serves we bambae i help blong karem ol prodius blong ol memba i go long ol mein market insaid long kaontri, mo semtaem karem ol kargo blong ol stoa blong ol memba i go long ol aelan.

Long taem blong operesen blong hem, Vanuatu Cooperative Federation i bin ranem tufala ship we nem blong tufala MV Nalkutan mo Semle Federation.

Ova 500 memba blong VPIEF we i mitt long Port Vila Stadium long 22 Disemba i harem long ripot blong exekutif kometi se bambae Fund i pem wan niufala barge ship long Japan.

Afta long ol diskasen, ol memba i agri se bambae ship ia i karem nem ia “Nalkutan 2”.

Semfala miting ia long Port Vila i agri blong openem doa kasem 22 Februare 2015, blong ol man i save go pem shea blong 2,000 vatu wetem VPIEF.

Afta long 22 Februare, bambae shea i go andap long 4,000 vatu.

Yumi Toktok Niuspepa i save se ofis blong VPIEF long Port Vila i openem ofis bakeken finis long Mande 5 Januare.

Author

admin

Leave a Reply

Your email address will not be published.