Tagabe Eria I Risivim Seken Rolaot Blong Rilif We I Kam Long Salvation Army

Franciska George I Raet,

1262875170914

Tagabe eria long Port Vila I bin glad tumas taem I lukim denominesen blong Salvation Army I bin kivim aot namba tu rolaot blong ol rilif saplae long eria blong hem long wik ia.

Long fesfala rolaot blong hem, Salvation Army bin kivimaot ol Hygiene Kit wetem wan basket we I kat insaed long hem, six botel blong 1.5 lita blong wota, be lo Wednesdei 22 Eprel Salvation Army I bin I kivimaot wan “Reconstruction mo Repair Voucher” blong VT 30,000 mo wan 25kg kilo blong rice.

Salvation Army hemi wan Kristian denominesen mo wan intanasonal charitable okanaesesen we I ron long wan strakja we I klosap olsem military mo beis blong hem long Vila hemi long Tagabe 21 Jump Street.

Voucher ia, SA I bin kivim blong helpem wan wan haos ol espeseli nao long smol eria blong 21 Jump Street blong rebildim mo riperem ol haos we oli bin damaj long taem blong Hariken Pam. Voucher ia oli save usum nomo long South Pacific Hardware long Tagabe mo hemi blong pem ol konstraksen materials mo kitchen hardware nomo. Salvation army I bin mekem I klia long taem ia se oli save usum voucher ia kasem stret amaon we I stap, mo afta long hem bambae oli kivim wan spred sit blong ol pipol I save putum ol resit long hem mo bambae I expae long namba 17 Mei yia ia.

Taem we Salvation Army I stap mekem distribusen blong hem, I bin kat wan bigfala grup blong ol man mo woman blong ol narafala eria we oli wantem pat long rilif saplae ia. Hemia I mekem se SA I mas kivimaot ol assesmen fom long olgeta blong fulumap mo bambae oli kivim ol distribusen blong olgeta long tedei Tasde 23 Eprel.

Pipol blong 21 Jump Street oli bin glad bigwan mo talem bigfala tankiu I ko long Salvation Army long help we hemi save kivim long six wik afta Hariken Pam blong helpem olgeta.

“Salvation Army I openem distribusen long evriman we I liv long 21 Jump Street mo oli no nidim ID olsem we Shefa province mo ol narafala okanaesesen oli stap mekem mo we I mekem se fulap long ol haos ol oli no risivim ol rilif saplae blong olgeta, I kat sam nomo we oli kat ID mo oli kat janis blong benefit long hem,” wan memba blong komuniti blong 21 Jump Street I talem.

Ol memba blong komuniti ia oli stap askem mo talem se “wea nao ol MPs mo ol Minista we oli votem olgeta I ko insaet long palemen blong helpem olgeta taem oli stap long trabol mo kaen situesen olsem we disasta I kilim nogud olgeta. Wea nao help we bambae oli mekem olsem ol man ia we oli no save olgeta mo oli no votem olgeta mo oli kam lo wan difren kaontri be oli kat hat blong helpem olgeta?

“Oli glad bigwan be yufala ol MPs mo ol minista wehem yufala??” oli talem.

Oli kohed blong talem se oli no save se long yia 2016 bambae oli vot o nokat from oli no hapi long ol man we oli votem olgeta I ko insaed long palemen mo Munisipol be oli fogetem olgeta. Oli stap talem bigfala tankiu long Salvation Army.

Fesfala rolaot blong SA hemi tu wiks afta long Hariken Pam.

Author

Witnol Benko

Leave a Reply

Your email address will not be published.