Oposisen I Askem Ol Jif blong Rispektem Malvatumauri mo ol Stampa Kaonsel

Memba blong Palemen blong Port Vila, honorabol Ralph Regevanu hemi talemaot long social media tede se ofis blong oposisen i mekem wan stetmen blong tok akensem fasin we sam jif ripresentetif blong sam aelan we oli kam blong mekem wan rikonsiliesen folem kes blong braeberi we i putum 14 MP insaed long kalapus.

Long wan pres konfrens tede long aftenun, oposisen i talem se konstityusen blong Vanuatu mo Nasonal Kaonsel blong ol Jif Ak we palemen i pasem i luksave nomo Malvatumauri Nasonal Kaonsel blong Jif mo ol Aelan Kaonsel blong Jif olsem ol jif we oli gat ples blong toktok ol isiu long nasonal level.

Presiden blong Malvatumauri Nasonal Kaonsel blong Jif, presiden blong Nikoleten long Tanna, Aelan Kaonsel blong Jif, mo Presiden blong Santo Aelan Kaonsel blong Jif, evriwan i no sapotem tingting blong ol jif ia we oli kam long Vila blong traem mekem kastom rekonsiliesen ia mo oli askem olgeta blong wet kasem kot i mekem wok blong hem bifo oli traem blong mekem eni samting long saed blong kastom olsem.

Jif blong nasara blong Port Vila tu, Jif Mantoi Kalsakau III blong Ifira, i talem semak toktok long ol jif ia taem oli mitim hem yestede mo hemia i putum kwestin mak tingting blong olgeta jif ia.

Ofis blong Oposisen i askem long ol jif we oli jas kam long Vila blong rispektem toktok blong Nasonal Kaonsel blong ol Jif, ol Aelan Kaonsel blong ol Jif blong ol aelan we oli kamaot long hem, mo tu jif blong nasara we oli stap long hem naoia long Port Vila.

Oposisen i talem se hemi luk save se emia i wan tingting blong konflk long intres nomo mo hemi notem tu ol politikol afiliesen blong sam blong olgeta jif ia we oli kam blong mekem rekonsiliesen ia.

Author

Yumi Toktok Stret

Yumi Toktok Stret reporter. based in Vanuatu, Fiji, Solomon Islands, PNG, Australia, New Zealand, USA, England, South America, Middle East.

Profile used by various journalist around the region.

Leave a Reply

Your email address will not be published.