Pablic Long Luganville I Presem Wok Blong Ol Polis

Nomata lo plante kritisim akensem ol polis lo social media network mo Facebook blo yumi toktok stret las yia
i kam, i no stopem olgeta polis blo yumi
nating blo oli wok mo blo kipim tras wetem pipol blo holem loa mo oda i stap oltaem long ol komiuniti blong yumi.

Long wik blo krismas mo niu yia lo Luganville, plante man presem bikwan wok blo ol polis lo nambatu town ia we lukim ol lafet i gohed gud mo nogat tumas trabol mo ol pipol oli tekem janis ia blo putum bak hop selebret wetem pis mo bildimap laf long hom mo komiuniti blo olgeta mo wan pablik selebresen olsem

‘Christmas in the Park’ o ‘krismas long La Plas pak’ hemi wan gudfala eksampol wetem wan rikod blong ol man woman mo pikinini long histori blong Luganville i kam tugeta long wan week.
Polis komanda blo north, Wille Samuel i talem long yumi toktok stret niuspepa se hemia i happen nomo folem ol niufala rod mo fasin blong wok blo polis i no long taem i kam blong wok wetem ol komiuniti lidas olsem ol jif, jioj, yut lida mo everiwan.

Plante pipol i save long Luganville bifo long ol taem blong lafet hemi wan bikfala jalenj long sosial oda we taem olsem i gat plante
drong man olbaot, plante kriminal aktiviti,
ol pipol fraet mo no fil sef nating long
nambatu taon ia we i gat tetin taosen
(13000) man oli liv long hem.
Komanda Samuel hemi talem se naoia
i gat wan klia pikja nao se ol kriminal activiti long Luganville i stap go daon from plante aweanes we oli stap mekem. Ol tingting blong pablik we oli stap komen long yumi toktok stret Facebook krup se Santo hemi jenis bikwan yumi toktok stret i fil se ol polis blong yumi nao holem sam ki blong ol jenis ia.

Luganville hemi wan taon we plante man i save long hem olsem Kanal mo hemi nambatu bikfala town blong Vanuatu wetem tetin tousen man mo ova long wan hanred (100) polis oli stap givim seveis long town ia wetem Sanma Province mo noten rijen.

I gat wan Luganville Municipal Kaonsel (LMK) mo olgeta tu oli putum ol municipal polis blong blong enfosem ol bae-loa blong blong LMK mo plante taem nao oli wok tugeta wetem Vanuatu Polis Fos olsem Komanda Samuel i talem, blo kipim taon i stap long oda oltaem.

Taon ia hemi gat wan history blong military o army intervention we long World War II klosap 40,000 soldia blong United States oli bin stesen long noten taon ia mo taem oli go bak Vanuatu hemi independent mo wan rebellion akensem kavman i kirap mo ol army blong Papua Niu Kini Difens Fos nao i kam helpem kavman putum bak loa mo oda long taon ia.

Afta long ol bikfala samting we i happen long history blong Kanal, sam yia afta 1980 taon ia i kam bak wan dak taon lo histori blo Vanuatu bakeken mo Vanuatu Polis mo Vanuatu Mobael Fos i mekem wan operesen we oli kolem ‘Operesen Klinim North’ mo i lukim plante kang memba mo ol ring lida blo ol kriminal activiti we i stap hapen lo town ia oli karem sam panismen.

Afta long ol taem ia polis i kontiniu blo mekem mo aweanes long town kasem rural erias mo ol man Luganville mo pipol blong Sanma oli stat blong luk save wok blong polis mo stat wok tugeta blong help protektem taon ia mo tede yumi luk ol jenis i stap hapen.

Sekiuriti blo nesen mo pipol blong hem mo ol investa we oli kam blong mekem business hemi impoten tumas blong everiwan i fil hapi mo sef oltaem blo wok bildim nesen ia mo wetem tingting olsem yumi bin sua se Vanuatu polis fos i bin pripea blong givim sekiuriti long ol taem lafet olsem oltaem.

Plante pipol i save gud situesen blong polis se i bin gat ol jenis we i happen long top pos blo komisina i no longtaem taem we Joshua Bong i finis mo Aru Maralau i go insaed mo las manis Maralau i risaen bakeken mo polis seveis komisin i apointem Komanda Job Esau i kam akting polis komisina naoia.

Ol muvmuv olsem i krietem fraetfraet long kantri be taem yumi toktok stret i askem komanda Samuel se ol jenis ia i stap afektem wok blo polis long noten taon? komanda not i talem se i nogat. Ol jenis ia i no afektem nating wok blong olgeta mo bae oli kontiniu blong givim sekiuriti long pipol blo noten taon mo not blong Vanuatu olsem everi taem.

Author

admin

Leave a Reply

Your email address will not be published.