Not Ambrym Praemeri Skul I Kasem Help

 

Ken Tate I raet,

Marmonie teacher
Magamone  teacher

Hemi wan drim kam tru blong Hed Masta, ol staff mo pikinini blong Magamone Praemeri Skul afta we Build Aid Company blong Ostrelia mo Philip kingreferrences blong Niu Silan I givhan long skul blong olgeta, Magamone Praemeri skul long noten pat blong aelan blong Ambrym long manis we I pas.

Tufala kampani ia I kam tugeta blong sponsarem ol samting olsem , timba , cement ,aean rufing, windo frem, ol jea, tebol, riding buk , komputa,wan trak blong sapotem skul mo oli manej blong bildim niufala klasrum blong yia 7 kasem yia 10 , domatri blong ol pikinini , daening hol , intanet skul , laebri mo lukluk I stap se oli stap tingting tu blong bildimap wan niufala klinik blong skul.

Magamone Primary skul hemi bin risivim ol material ia finis be wok I no save ko hed yet from oli stap wet blong risivim tu aid woka blong tufala kampany ia blong kasem skul long end blong manis ia blong wok I save ko hed long nexis manis ,Maj.

Tufala kampani ia I soem sapot blong tufala I ko long skul ia from sins we Magamone primary skul hemi stat I no kat eni developmen mo skul hemi no stebol gud blong ol program I save kohed. Skul I no save stat gud tu from we I nokat ol pemanen haos we I save akomodetem ol pikinini long hem we I mekem se hedmasta blong skul I mas kolukolgeta blong askem sapot.

“Risen ia nao I mekem se mi olsem hedmasta blong Magamone Primary Skul, mi askem help blong olgeta from naoia namba blong ol pikinini I stap kam antap be I nokat ol gudfala fasiliti blong helpem ol pikinini ia wetem,” hedmasta Willie Bong I talem.

“Mi wandem talem tok thank yu blong mi I ko long Build Aid Company blong Ostrelia mo Philip Kingreferrences blong New Zealand from tru long glad hat blong olgeta I mekem skul I save kam antap mo kominiti blong Magamone hemi save lukem se I kat yia seven i ko kasem yia ten long skul ia,” Bong I talem.

Hedmasta Bong hemi kohed blong talem se skul hemi bin ko tru long ol had taem longtaem finis I kam mo olgeta I no putum tingting blong olgeta I ko daon,be oli kohed nomo kasem yia ia taem we big man hemi ansarem preia blong olgeta tru long Build Aid Company blong Ostrelia mo Philip Kingreferences blong New Zealand .

Magamone Praemeri Skul hemi wan Anglofon skul we I kat ova long tri handred pikinini I stap long hem.

Author

Witnol Benko

Leave a Reply

Your email address will not be published.