NAMBA 4 NASONAL KOKAS MITING BLONG GJP I PUTUM BAK REGENVANU OLSEM PRESIDENT

Las wik, long Wenisdei 25 mo Tasde 26 Januari, Graon mo Jastis Pati (GJP) hemi bin holem namba 4 Nasonal Kokas miting blong hem long Luganville. Konstityusen blong GJP hemi talem se evri yia i mas gat wan Nasonal Kokas miting we i tekem tugeta evri MP mo Kaonsela blong pati, wetem tu ol jeaman blong olgeta. Bigfala tingting blong Nasonal Kokas evri yia hemi blong sherem tingting mo givhan long manejmen mo grow blong pati. 2016 Kokas miting hemi shud stap long manis Disemba finis be oli seftem kam long Januari from siting blong Palamen we i bin gohed kasem kolosap long Krismes.

Long Nasonal Kokas miting i bin gat 6 GJP Memba blong Palamen mo kolosap evri 17 GJP Kaonsela we oli stap serv naoia long ol Provinsel Gavman blong Sanma, Penama, Malampa, Shefa mo Tafea, mo tu long tufala Munisipol Kaonsel blong Luganville mo Port Vila. Ol tufala GJP Kaonsela we oli holem posisen blong Presiden blong Malampa mo Presiden blong Sanma Provins i bin stap long miting tu. Nasonal Kokas i bin lukluk bak long divelopmen blong pati long las yia 2016 mo mekem sam resolusen blong givhan long wok blong pati mo blong save ajivim ol objektiv blong hem olsem part blong Gavman. Kokas i bin apruvum tu ol nem blong ol kandidet we bae oli kontestem provinsel eleksen blong Tafea, Shefa, Malampa mo Penama long 23 Maj 2017. Long miting ia tu, GJP i bin mekem fes eleksen blong Presiden mo Vaes-Presiden blong pati. Ralph Regenvanu hemi bin elekted olsem Presiden blong pati blong 4 yia bakegen mo MP blong Tanna Andrew Napuat hemi bin elekted olsem fes Vaes-Presiden blong pati, wan disisen we Nasonal Eksekutiv blong Pati i apruvum long wik ia. Nekis Nasonal Kokas miting bae i stap long Malekula long Januari nekis yia.

Sos: GJP

Author

Yumi Toktok Stret

Yumi Toktok Stret reporter. based in Vanuatu, Fiji, Solomon Islands, PNG, Australia, New Zealand, USA, England, South America, Middle East.

Profile used by various journalist around the region.

Leave a Reply

Your email address will not be published.