Malampa Revivors i Qualifae blong Play long 2017 O-Lik

Malampa Revivors futbol klab we i kamaot long Luganville futbol lik emi qualify blong ple long 2017 ‘OFC Champions League’ finis wetem Amicale.

Emia i folem nomo ol niufala jenis long fomat blong O-Lik we i alaoem wanwan kantri save kat 2 klab i ple long jampionsip ia, mo from niufala tingting blong VFF blong givim taem long ol lokol klab i preparem olgeta fastaem, emi long ‘best interest’ blong ol klab, blong save kat wan yia preparesen bifo O-Lik i stat.

Long faenal blong Nasonal Supa Lik long 2015, Amicale FC emi kam fes mo Malampa Revivors FC emi karem nambatu ples, i mekem se from from jenis blong fomat blong alaoem tu klab, VFF kongres i se ol Klab long ol MA nidim 1 yia preparesen mo Malampa i sud go daerek blong representem ol MA olsem from hem jampion blong notern rijen finis afta we hemi kam namba tu long 2015 faenal.

Wan long ol bigfala tingting insaed long desisen blong kongres nao emi blong leftemap futbol long ol MA mo emi wok stret folem fasin blong ‘decentralisation’ we VFF i stap karemaot naoia.

Malampa i prufum hem long NSL mo mekem history olsem fes klab aotsaed Port Vila blong kasem NSL faenal.

Long pas O-Lik Amicale nomo i stap go insaed blong ripresentem Vanuatu, mo from oli kat gudfala ‘financial backup’ i mekem i no wan problem blong klab, mo tu oli save karem ol pleya aotsaed kwiktaem mo pem olgeta blong fixim ol hol long klab.

Wetem 1 yia preparesen, wan klab i save tren gud, faenem wan gud koj mo save faenem mane blong sapotem em blong go ovasi blong ple sam frenli mo go ple long O-Lik, mo Malampa Revivors i karem sam tingting finis blong helpem hem olsem blong karem wan intanasonal koj i save kam stap wetem tim bifo i go daon long 2017.

From Revivors emi wan christian sports group emi save lukluk long ol network aotsaed blong help, mo emia emi sam tingting nomo mo bae yumi wait blong luk wanem bae i happen nekis yia 2016.

Author

The Penguin

A blogger from Vanuatu with interest in sports, ict, agriculture, tourism, history and many other thingamajig.

Leave a Reply

Your email address will not be published.