Lfa I Mekem Rikonsiliasen Wetem Ol Refri

Luganville Futbol Asosiesen las
Tiusde namba teti (30) i disaed blo berem ol difrenses blo hem wetem ol refri mo wok lo 2015 wetem niufala tingting long 2015.

Sekretri blo lik Mr. Batick i ripotem lo Yumi toktok stret se long namba teti disemba i gat wan rekonsiliesen blong stretem ol raorao we i stap wetem lik mo ol referi blong lik i ran bakeken long 2015 wetem gud spirit.

Yumi toktok stret i bin toktok wetem wan long ol refri ia mo hemi i talem se las yia ol referee oli bin straek afta we oli no bin hapi long sam outstanding alaoens we oli gat wetem lik mo straek ia i risal long LFA i saspendem tri (3) long ol ofisa ia afta i mekem se i gat moa raorao insaed lo futbol lik ia afta ol maj blong sisen i no bin save finis gud.

James Ulas we hemi Deputy Mayor blo Luganville Municipality nao hemi bin kam insaed blo putum bak pis mo mekem rekonsiliesen blong tufala pati insaed long lik blo LFA mo hemi bin talem long yumi toktok stret se hemi mekem nomo from gud blong futbol mo i wantem luk futbol i gro gud long noten taon.

Ol referi oli ple wan impoten pat insaed long kem ia blo futbol mo olgeta lik mo federesen blong futbol i mas handelem gud ol isiu blong olgeta blong i nogat raorao insaed we i save tekem i go long ol narafala problem.
Sisen blong 2015 bae gohed bakeken wetem ol nara maj we oli no bin ple olgeta las yia mo LFA i stap enkarejem ol fans blong kam bak sapotem ol tim blong olgeta bakeken mo i stap wisim ol klabs, ol referi, ol pleia, ol fan mo everiwan we ol futbol family wan gudfala sisen blong futbol long 2015.

Feedback: wbenko@yumitoktokstret.org

Author

admin

Leave a Reply

Your email address will not be published.