Lelepa I Rere Blong Welkamem Vlp Long Nasara Blong Hem

10270494_338230576373362_4821562007407228684_n

Vourie Moli I Raet,

Olsem oltaem long ol dei mo manis we I stap ko kolosap long taem blong ol eleksen, pipol I stap stat blong disaed nao blong wanem pati o kandidet nao oli sapotem mo trastem blong kastem ol vot blong olgeta from. Hemia hemi no pruv rong taem I lukim long las wik Paramaon jif blong Lelepa aelan, George Tawanearu mo Komunity lida, Kalmari Touguluman , oli mekem wan “vow” blong muv aot long Graon mo Jastis Pati (GJP), mo joinem Vanuatu Leba Pati (VLP).

Paramaon jif mo komunity lida blong smol aelan ia I stap pripea naoia blong bambae VLP I ko kamaot long nasara blong hae jif ia long nekis wik blong oli ofisietem wan kastom seremoni blong silim ol tingting mo toktok ia.

Lida blong VLP, Joshua Kalsakau I talemaot long YTS se ol pipol blong Efate rurol mo speseli nao olgeta long Lelepa oli wantem muvaot long GJP mo joinem pati blong hem, from nomo se I kat tumas kiaman promes we I stap kam long MP blong olgeta mo lida blong pati we oli bin trastem long las jenerol Eleksen.

“Risen we oli talem (blong joinem VLP), hemi from ol toktok kiaman we Minista Ralph mo MP Gillion oli bin promesem help I ko long olgeta be oli no luk wan gud saen long promes ia mekem se tedei oli kam long wan tingting blong muvaot long GJP mo joinem VLP. VLP I helpem olgeta wetem wanem we oli askm,” Kalsakau I talem.

Long las wik pipol I risivim wan amaon blong 100,000 Vatu, wan amaon blong Vatu we komunity I bin askem long taem long MP blong olgeta we hemi MP Gillion.

“Olgeta pipol oli nidim faenans and yumi no mas turnem wan blaen ae long olgeta. Oli stap long nid, mo naoia pipol oli moa ten hapi mo oli rere blong welkamem VLP long nasara blong olgeta long nekis wik,” Mr Kalsakau I konklud blong talem.

Author

Witnol Benko

Leave a Reply

Your email address will not be published.