GJP i putum praeoriti long politikol rifom

GJP i anaonsem se bigfala praeoriti blong hem long nekis gavman hemi blong mekem politikol rifom, hemia blong jenisim Konstityusen mo ol loa blong stopem politikol instabiliti mo enkarejem ol gudfala fasen blong mekem politik.

Sam blong ol tingting we i stap long polisi platfom blong GJP hemi blong jenisim Konstityusen blong:

  1. i) karemaot raet blong ol MP blong save jenisim pati o krosem floa blong Palamen olsem we oli wantem
  2. ii) katem daon hamas mosen blong nogat trast i save gat long wan term blong Palamen (lego wan PM i save mekem wok blong 1 yia without mosen)

iii) mekem fasen blong putum wan mosen blong nogat trast i kam moa strong (eksampol, mekem se 27 MP i mas saenem mosen long fored blong Spika long ofis blong hem)

  1. iv) mekem se i save gat loa blong kontrolem ol politikol pati
  2. v) karemaot paoa blong wan minority gavman i save askem Presiden blong disolvem Palamen.

Taem yumi amendem konstityusen finis (we bae i nidim wan referendum we evri man i mas vot long hem), GJP i putum praeoriti tu blong pasem wan niufala loa blong kontrolem ol politikol pati, blong mekem ol samting olsem:

  1. i) putum kraeteria blong save stanemap wan niu politikol pati
  2. ii) mekem se ol politikol pati i mas talemaot se oli kasem mane blong olgeta wea

iii) putum kraeteria blong hamas sapot wan politikol pati o wan indipenden kandidet i mas gat blong save kontestem wan eleksen

GJP i wantem tu blong jenisim Representation of the People Act blong putum moa kraeteria blong wan man o wan woman i save stanap olsem wan kandidet long wan eleksen mo mekem sistem blong rejistresen blong vota i kam moa gud, blong givim moa janis long ol pipol i save rejista blo vot, mo blong katem daon ol kruked fasen blong vot.

Wan narafala jenis we GJP i wantem mekem hemi blong jenisim Representation of the Peoples Act blong mekem se taem wan MP i lusum jea blong hem, “runner up” blong hem long las eleksen otomatikli bae i tekem jea ia, blong stopem nid mo bigfala kost blong gat by-eleksen.

Hemi impoten tu blong jenisim Representation of the Peoples Act long saed blong ol eleksen, blong putum ol klia rul long wanem hemi wan “kampen”, wanem wan “caretaker” Gavman i save mekem, mo hao wan propos kandidet i save givim samting long ol vota.

Author

Yumi Toktok Stret

Yumi Toktok Stret reporter. based in Vanuatu, Fiji, Solomon Islands, PNG, Australia, New Zealand, USA, England, South America, Middle East.

Profile used by various journalist around the region.

Leave a Reply

Your email address will not be published.