Eton Vilij: Fesfala Komuniti Blong Karem Rilif Saplae Blong Vrcs

Gika Gorge i Ritaem

Eton

Eton Vilij nao hemi fesfala komuniti truaot long kantri we hemi laki blong karem fes rolaot blong ol rilif saplae blong Red Cross Sosaeti. George Iapson olsem Fes Politikol Advaesa long Ofis blong Praem Minista, I stap long taem ia mo konfemem long ol pipol se I kat tu bigfla ship I stap rere blong kam naoia, wan blong Franis mo wan blong Ostrelia wetem ol kakae blong kivimaot long ol pipol we oli afekted long disasta we I jus pas.
Wetem help blong ol dona patna, Red Cross I bin kivimaot long vilij ia, 50 kit haos insaet long ol kit haos ia I kat wan sola laet, wan set blong kitchen kit, wan set blong Hygiene kit, wan settlement kit(tent), wan plastic mat, mo tu tapolen blong wan haos we TC Pam I bin damejem gud.
Delegesen we I bin ko blong witnesem distribusen blong fesfala rilif saplae ia I lukim, Fes Politikol advaesa long Ofis blong PM, George Iapson, Fes Politikol Advaesa long Climate Change, Gideon Tabius, Pasta mo jif blong Niu Gavana Jioj, mo Daerekta blong Yumi Toktok Stret Niuspepa, Julian Ligo.
George Iapson I bin givimaot ol Toktok blong talem sori long olgeta pipol long eria ia afta

we oli bin fesem wan longtaem blong hadtaem blong wet from ol rilif saplae. Hemi talem se gavman I mas wet blong evri donesen I kam insaed bifo oli save mekem ol distribusen I ko long ol eria truaot long kantri we oli bin afekted long taem blong saeklon.
Iapson long bihaf blong gavman I talem bigfala tankiu long ol dona patna olsem USA, NZ, Franis, Inglan, Rasia, China, Japan NC mo ol narafala kantri long gladhat blong olgeta blong givhan long Vanuatu.
VRCS I aknolejem long taem ia presens mo help blong samfala federeisen we oli save help long saed blong donesen olsem Tonga Federeisen,Fijian Federeisen,Australian federeisen mo New Zealand federeisen.
Fes Politikol Advaesa blong Climate Change I kam blong konkludim mo konfemem se hemia I no fes mo las distribusen blong ol rilif saplae, sapos we I kat nid blong kambak bambae saplae I mas kambak. Hemi talem se bambae gavman I distributem ol sids long wanwan famle blong oli mas planem blong mekem se ol garen blong olgeta oli save karem kakae bakagen mo pipol I save benefit long hem.

 

 

Author

Witnol Benko

Leave a Reply

Your email address will not be published.