Akhamb Aelan holem saksesful GJP Nasonal Kokas miting

Long Fraede 11 kasem Sande 14 Januari, Graon mo Jastis Pati (GJP) hemi bin holem namba 5 Nasonal Kokas miting blong hem long aelan blong Akhamb long saot Malekula, hom bes blong GJP MP blong Malekula, Hon. John Sala.

Konstityusen blong GJP hemi talem se evri yia i mas gat wan Nasonal Kokas miting we i tekem tugeta evri MP mo Kaonsela blong pati, wetem tu ol jeaman blong olgeta.  Bigfala tingting blong Nasonal Kokas evri yia hemi blong sherem tingting mo givhan long manejmen mo growth blong pati.

Long Nasonal Kokas miting i bin gat 6 GJP Memba blong Palamen mo kolosap evri 18 GJP Kaonsela we oli stap serv naoia long ol Provinsel Gavman blong Sanma, Penama, Malampa, Shefa mo Tafea, mo tu long tufala Minisipol Kaonsel blong Luganville mo Port Vila.

Nasonal Kokas i bin lukluk bak long divelopmen blong pati long las yia 2017 mo mekem sam resolusen blong givhan long wok blong pati mo blong save ajivim ol objektiv blong hem olsem part blong Gavman.

Kokas i bin apruvum tu ol nem blong ol kandidet we bae oli kontestem minisipol eleksen blong Port Vila long Maj long yia ia, mo nem blong sam blong olgeta kandidet blong kontest long jenerol eleksen long 2020.

Hae Jif, ol jioj lida mo pipol blong Akhamb Aelan oli bin pripea mo mekem wan gudfala welkam long Graon mo Jastis Pati mo oli talem se hemi no fes taem we wan politikol pati hemi holem miting long aelan ia.

Oli talem se presens blong GJP politikol pati mo evri elekted ofisol blong hem hemi wan hona long olgeta mo oli luk fowod long gudfala rilesensip wetem MP blong olgeta mo GJP long ol yia we i stap kam.  Miting hemi bin end wetem wan jioj seves we oli givim raet long GJP blong lidim mo afta i gat wan bigfala lanj we pipol blong Akhamb oli kakai tugeta wetem evri deleget.

Nekis Nasonal Kokas miting bae i stap long Tanna long manis Ogis nekis yia.

Author

Yumi Toktok Stret

Yumi Toktok Stret reporter. based in Vanuatu, Fiji, Solomon Islands, PNG, Australia, New Zealand, USA, England, South America, Middle East.

Profile used by various journalist around the region.