‘VFF NSL Pool B’ i kikof long Lakatoro

Vanuatu Futbol Federesen Nasonal Supa Lik ‘Pool B’ i kikof long Malekula tede aftanun namba 18 mo bae i stap kasem 22 Septemba emia long Fraeda emia long Wilkins Stadium long Lakatoro.

Ol tim we i tekpat long krup ia i kat Vaum United FC blong Luganville Futbol Asosiesen, Spyder FC blong Malo aelan we oli kamaot long Asosiesen blong Sanma, AS BVP FC blong Vao aelan long Malekula we i ripresentem Malampa Futbol Asosiesen mo nara tim blong Malampa we hemi Tobol FC we oli kam long West Ambrym.

Day 1 – Match 1

Tobol FC hemi dro wetem Spyder long 3-3.

Day 2 – Match 2

Vaum United i winim AS BVP long 5-2.

Kompetisen maneja blong Vanuatu Futbol Federesen i mekem sam aptet ripot long fesbuk tede stret long Lakatoro Wilkins Stadium.

Vaum United

Vaum United hemi 2nd wan team blong LFA mo oli yusum ol pleya olsem Bethuel Ollie long U-20 wol kap long Korea, Gregory Patrick we hemi wan narafala U-20 pleya blong Vanuatu, Justin Koka we i ple plante long Tafea, Dalong Damelip we hemi wan senia pleya long Vanuatu skwat, Rexley Tari we hemi ple plante bifo long Amicale FC mo senia tim blong Vanuatu.

Spyder

Spyder hemi namba tri tim blong SFA mo oli ol pleya we oli kamaot long aelan blong Malo emia long Santo.

Tobol

Tobol hemi jampion long Malampa mo oli kamaot long Craig-cove emia long West blong Ambrym. Oli yusum Zidane Maguekon we hemi wan pleya blong Vanuatu U-17 we oli bin go ple long Tahiti.

AS BVP

AS BVP hemi wan strong tim blong Malekula mo oli kamaot long aelan Vao we hemi wan aelan we futbol blong hem i strong bitim ol narafala eria long Malekula bifo. Oli namba tri ranap blong MFA long 2016/17 sisen.

Pool A

Pool A long Luganville Soccer City las wikl, Malampa Revivors hemi winim.

Pool B

Pool B oli stap ple naoia long Lakatoro Wilkins Stadium.

Pool C

Pool C bae oli ple long Saratamata long East Ambae nekis week.

Pool D

Pool D Malnaruru we hemi kamaot long Shefa i winim.

Pool E

Pool E Medic blong Tanna hemi winim.

Author

admin