Oposisen I Faelem Wan ‘Constitutional Application’ Blong Spika Singaot Palemen

Ol Memba blong palemen long oposisen i faelem wan ‘urgent constitutional application’ yestete aftanun blong spika blong palemen i singaot ‘2nd ordinary session’ blong palemen blong 2015, emia i kamaot long fran pej blong Daily Post tede mo sosial blogger ‘Daily Digest’ i samaraisem tede morning.

Kes ia i gat 24 MP blong palemen oli saenem olsem ‘first applicant’ mo seken apliken emi niufala kandidet Kenneth Natapei we winim las bae-eleksen mo hemi mas ‘swear-in’ olsem wan memba blong palemen blong save karem MP alaoens blong hem blong save kontiniu long wok blong papa blong hem long Port Vila konstitiuensi.

‘First respondent’ long case ia hemi spika blong palemen mo seken risponden emi ripablik blong Vanuatu.

Spika blong palemen naoia emi stap long kalabus mo ‘second deputy speaker’ mo nambatri deputi spika i stap long kalabus tu, mo fes deputi spika nomo, honorabol MP Samsen Samson i stap iet blong save singaotem haos blong miting, naoia i kam wan problem tu taem plante MP i stap long kalabus mo hu blong tokbaot ‘2016 budget’, mo budget emi wan bigfala konsen blong oposisen mo plante ekonomis.

Oposisen i klem se konstitiusen blong Vanuatu i talem se palemen i save ranem 2 sisen long wan yia, fes mo seken odineri sisen, mo taem spika i no wantem singaotem palemen long seken odineri sisen, emia no stret olsem konstitiusen i talem.

Bifo isiu ia i go long kasem kot long yestete, ol fes lukluk long ‘clause’ sam wik i pas, i bin kat nara laen we kavman i stap ’emphasisem’ se, “mo spika i mas toktok wetem Praem Minista bifo i singaot palemen i kam sitaon”, emi wan kwestin we plante man i ting se i givim pawa blong PM i save talem ‘yes’ o ‘no’? O hemia emi desisen blong spika nomo. Yumi wet nomo long aotkam blong kot.

Miting haus blong ol memba blong palemen. Photo: Loop PNG - www.looppng.com
Miting haus blong ol memba blong palemen. Photo: Loop PNG – www.looppng.com

PM Sato Kilman Livtunvanu i awea finis taem oposisen i bin askem long sam wik i pas mo oli mekem wan ‘ultimatum’ blong spika i singaot palemen o fesem kot, be akting spika Samsen Samson i bin rispon se bae hemi toktok long PM fastaem. Oposisen i bin askem blong palemen i mas sitaon kwik taem blong tokbaot ‘budget’ mo oli akri blong sapotem kavman, be i no long taem nating, PM Kilman i se bae palemen i sitaon from bajet ‘debate’ nekis yia nomo long 2016 from ol bikfala disasta we yumi bin kasem olsem saeklon Pam mo El Nino, drae sisen ia mekem yumi mas priperem gud bajet blong save makem daon everi samting blong bajet i save adresem.

Toktok blong PM i no tokbaot eni seken odineri sisen nating, mo i putum wan kwestin mak long oposisen mekem se oposisen i faelem wan konstitiusenal aplikesen akensem spika yestete. Ol isiu ia i kam antap mo plante media oli stat kolem se hemi wan ‘political crisis’ from plante long ol MP ia oli stap insaed long kalabus mo i mekem se i nogat inaf namba blong tokbaot bajet blong yia 2016.

Author

The Penguin

A blogger from Vanuatu with interest in sports, ict, agriculture, tourism, history and many other thingamajig.

Leave a Reply

Your email address will not be published.