Minista Leingkon: I nokat wan HOM blo Brussels yet

Minista blong Foren Afea blong Vanuatu Bruno Leingkone i sakemaot ol toktok se Head of Mission (HOM) long Brussel hemi jenis finis, toktok ia i no tru.

Toktok blong hem long wan fesbuk profael blong hem tede moning, minista i mekem klarifikesen se kavman i no mekem wan apoinmen yet long kes blong Brussels mo ol toktok long Yumi Toktok Stret krup long Facebook hemi no tru.

“Olsem Foreign Minister Blo Vanuatu mi wandem mekem ol klarifikesen ia folem fo (4) ‘Head of Mission’ we ‘Foreign Affairs’ dipatmen i advetaesem blong Brussels, Noumea, Fiji, Hangzhou”, Minista i talem.

“Blong konfemem nomo se Charles Lini hemi no aplae nating lo pos blong ambasada blong Brussels mo bae hemi no save karem posisen ia long Brussels.”

“Noumea hemi semak tu se Jean Paul Virelala hemi neva aplae nomo hemi stap long ‘Foreign Service Board’ blong jekem ol aplikesen mo mekem skrining”.

“Fiji mifala i advetaesem finis mo bod i bin sidaon from be nara isiu se Nikenike Vurobaravu i putum long kot mekem se emi on ‘hold’ i stap kasem kot i stretem, mo kavman i stap toktok wetem Fiji long isiu ia”.

Photo: HOM blong Vanuatu long Hong Kong, Mr. Andrew Leong.

Minista i stap mekem toksave i go long olgeta memba blong ol krup long sosiol media we oli stap mekem ol diskasen long isiu ia se oli mas tekem ol stret mo tru infomesen o ‘facts’ bifo oli putum aot long ol pablik forum olsem.

Foren Seves Bod i stat sidaon yestete finis blong go tru long ol aplikesen mo mekem ol wok blong olgeta blong jusum ol raet HOM.

Minista Leingkone i mekem klia toktok blong Prime Minister Charlot Salwai Tabimasmas se wok blo FSB i mas neutrol, transparen , nokat fevaritisim mo emi final ‘without political interference’ long kaonsel blo ministas (KOM).

Websaet blong DFA i no soem hu nao ol HOM we oli stap finis long wok mo DFA i no serem eni histri blong wok ia.

Ol nem blong ol Vanuatu diplomat we plante pipol i save bae hat, olsem, Mr. Kalfau Kaloris hemi HOM blong Vanuatu long Australia, Mr. Nikenike Vurobaravu long Fiji, Mr. Andrew Leong long Hong Kong, Mr. Dennis Nai long China, Mr. Raymond Manuake long Noumea mo Roy Mickey Joy long Brussels.

Author

admin

Leave a Reply

Your email address will not be published.