Jampion blong LFA mo SFA i stap lidim NSL Pool A

Vanuatu Futbol Federesen Nasonal Supa Lik ‘Pool A’ risal i soem Vanmolmol wetem Malampa Revivors i lidim pul blong Luganville ia wetem tri poen long tebol.

Fes maj blong NSL long Soccer City Stadium yestete long wan klok, wina blong Sanma Futbol Asosiesen (SFA) Vanmolmol i panjem gud Tiwe FC blong Baiap long West Ambrym we hemi rana ap blong Malampa Futbol Asosiesen (MFA) long wan hevi lid long ol fes minit blong fes haf wetem tri poen lid.

Ol fes minit ia maet jampion blong MFA ia i no redi gud taem Jerry Lum i openem sko long ten (10) minit blong fes haf mo Kalfau Lum i putum narawan long fiftin (15) minit mo Josias i klosem namba tri poen long 23 minit.

Arrow
Arrow
Tiwe FC - 2016/17 MFA Rana ap
Slider

Tiwe FC i stat blong okanaesem olgeta bakeken mo stopem Vanmolmol blong nomo sko kasem eiti fo minit blong seken haf taem sabstitiut Remy Avok we i stap ple long Tafea FC long Luganville i kam insaed mo putum kol blong Tiwe FC blong klosem maj ia long 3-1.

Long seken maj long tri klok, Malampa Revivors we hemi jampion blong Luganville Futbol Asosiesen i ple wetem Veoa FC blong Tutuba aelan we hemi rana ap blong SFA wetem wan intresting fes haf taem Andre Batick i mestem tu klia poen blong hem mo Veoa i no kivim janis mo mekem ol brek tru long difens blong Revivors wetem ol spid blong Romano Moli mo winim wan penalti long fes teti seven minit mo Abraham i sendem wan bol we i mekem Jimmy Lukai i jam i go long difren ples.

Nomata long 1-0 lid long fes haf, Malampa Revivors i go okanaes mo kam bak long seken haf taem Andre Batick i faenem net blong Tutuba long siksti eit (68) minit mo Veoa i manej blong holem tait jampion blong Luganville long 2016/17 sisen kasem 82 minim taem Batick i mekem net i swelap bakeken mo bifo refri Nawen Hopkins i blowem wisel blong hem, Joshua mo Tondy Kaliter tufala klosem sko long injuri taem blong putum Malampa Revivors i win long 4-1.

Tumoro bae Malampa Revivors i ple Vanmolmol long wan klok mo Tiwe bae ple Veoa long tri klok.

Tufala tim blong Torba i no save mekem i kam long tournament ia from problem blong faenans.

Author

admin