Hu ia Jayden K. Smith mo from wanem yu mas wari?

Ating Jayden K Smith hemi wan man we i just wantem addem yu olsem fren blong hem nomo long fesbuk.

Plante long yumi i join blong sendem wan warning mesej we i stap go raon long fesbuk long wik ia we i talem se “yu no mas mekem fren wetem wan fesbuk nem ia Jayden K Smith”.

Mesej ia we fulap long yumi i risivim tru long fesbuk i se man ia hemi wan ‘hacker’ mo yu no mas mekem fren wetem hem from bae hemi kam insaed long fesbuk blong yu mo mekem olsem ol haka i stap mekem blong stilim infomesen blong yu.

Emia wan bikfala kiaman from i nokat wan Jayden K Smith i stap go raon mo askem fren long ol man.

Long ‘twitter’ plante man oli mekem man i laf long nem mo kiaman stori ia we i talem long inglis se “Please tell all the contacts in your Messenger list, not to accept Jayden K Smith friendship request. He is a hacker and has the system connected to your Facebook account. If one of your contacts accepts it, you will also be hacked, so make sure that all your friends know it. Thanks. Forwarded as received.”

Ol semak mesej olsem i bin kamaot bifo mo hemia hemi wan niufala stori we i semak be wetem wan difren nem bakeken from long bifo oli yusum ol nem ia olsem Anwar jitou, Tanner Dwyer mo Bobby Roberts.

Naoia man we hemi yusum Jayden K Smith long Facebook i stap kam popula from kiaman stori ia.

I kat sam narawan tu wetem wan difren kiaman toktok se “spos yu no sharem bae ol foto blong yu i save go pablik long taem laen blong yu”, mo i kat wan narafala mesej we oli se “bae fesbuk i jajem yu”.

Fulap we oli save long ol kiaman mesej olsem mo narawan we oli semak, oli no tajem mo oli lego i stap mo talem long man we i sendem blong nomo sendem olbaot o mekem sam stori blong laf olsem olgeta ia.

Wanem nao yu mas mekem?

From i no klia se Jayden K Smith hemi wan haka o no, ol man blong intenet oli se mesej ia hemi ol skam nomo. Jayden hemi semak olsem eni narafala nem nomo long fesbuk mo eniwan we i yusum, maet i wantem pleple o kopi nomo blong mekem yu fraet.

Author

admin