From wanem Tabu Pacer-plus?

Tede long Vanuatu, blong andastanem ‘Pacer-plus’ mo from wanem ‘Tabu Pacer-plus, fulap man mo woman i no save wanem topik ia spos wan i statem long nakamal.

So blong kliarem long yumi, Pacer-plus i kam fastaem mo long Wikipedia oli se ‘The Pacific Agreement on Closer Economic Relations (PACER)’ mo hemia i minim se hemi wan akrimen blong ol pasifik kantri we oli memba blong ‘Pacific Island Forum’ we Australia mo New Zealand insaed mo wok blong akrimen ia blong givim wan strakja long fasin blong divelopmen mo kat ‘free trade’ long ol pasifik kantri we oli akri long hem.

Tabu Pacer-plus hemi narafala tingting we i go akensem tingting blong fri tret akrimen mo hemi wan krup blong ‘Non-Government Organisation’ we oli kolem ‘Pacific Network on Globalisation (PANG)‘ mo olgeta nao oli stap wok blong stopem Pacer-plus mo advaesem ol smol pasifik kantri blong no saenem pepa ia.

Nomata we ofis blong ‘Office of the Chief Trade Advisor’ hemi talem se Pacer-plus i kat plante benefit, PANG mo krup blong hem oli stap kampen akensem.

Las wik Vanuatu we hemi wan memba blong PIF i talem se bae hemi no saenem pepa ia fastaem mo oli wantem kat plante taem blong lukluk tru bifo oli saenem pepa ia.

Tingting blong Vanuatu blong ‘No Sign Pacer-plus‘, Dr Patricia we hemi ‘Convener of the Australian Fair Trade in Investment Network’ i talem se maet i kat sam samting i no stret insaed long akrimen ia mekem sam kantri i no wantem saenem mo i soem se Pacer-plus pepa ia i no strong gud tumas.

Solomon Island tu i no wantem saenem pepa ia wetem Fiji mo Papua New Guinea wetem tingting se PACER-Plus bae lidim olgeta i go rong mo oli se oli wantem stanap olgeta mo no nidim Australia mo New Zealand blong mekem ol samting blong olgeta.

Wan ripot we OXFARM i mekem we oli kolem ‘PACER Plus and its Alternatives’ i soem se i kat plante fasin blong mekem tred mo i gud faenem wan rod we i stret spos ol narawan i no wok.

ol tred akrimen we oli stap wok o lukluk blong mekem naoia – OXFARM

Blong andastandem gud topik ia i go moa, yumi mas ridim plante ol pepa we ‘New Zealand Foreign Affairs & Trade’ i raetem mo ridim ol pepa we ol difren krup long pasifik ol raetem nomata oli akri o no, be emia nao bae yu save skelem ol tingting mo save moa samting long topik ia Pacer-plus.

Photo by Tabu Pacer-plu facebook page

Author

admin